នាព្រឹកថ្ងៃព្រហស្បតិ៍ ៥កើត ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៩ ខែធ្នូ ឆ្នាំ២០២១ នៅទីស្តីការក្រសួង ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ អនុញ្ញាតឱ្យ ឯកឧត្តម Jacques PELLET ឯកអគ្គរដ្ឋទូតវិសាមញ្ញនិងពេញសមត្ថភាព នៃសាធារណរដ្ឋបារាំង ប្រចាំនៅព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ។
ក្នុងជំនួបនេះ ឯកឧត្តម Jacques PELLET ឯកអគ្គរដ្ឋទូតនៃសាធារណរដ្ឋបារាំងប្រចាំកម្ពុជា បានឱ្យដឹងថា គោលបំណងនៃជំនួបនាពេលនេះ គឺដើម្បីស្វែងយល់អំពីវិស័យសំណង់ និងការរៀបចំទីក្រុងក្នុងព្រះរាជាណាចក្រកម្ពុជាព្រមទាំងស្វែងយល់អំពីចក្ខុវិស័យរបស់ ឯកឧត្តមឧបនាយករដ្ឋមន្ត្រី ជា សុផារ៉ា ក្នុងវិស័យសំណង់និងការរៀបចំទីក្រុងក្នុងព្រះរាជាណាចក្រកម្ពុជា និងបញ្ហាប្រឈមដែលក្រសួងកំពុងតែជួបប្រទះផងដែរ។ ជាការឆ្លើយតប ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានបង្ហាញជូន ឯកអគ្គរដ្ឋទូតសាធារណរដ្ឋបារាំងប្រចាំកម្ពុជា អំពីការងារមួយចំនួនដូចជាការប្រៀបធៀបការអនុវត្តច្បាប់ស្ដីពីសំណង់ មុននិងក្រោយច្បាប់ស្ដីពីសំណង់ត្រូវបានដាក់ឱ្យប្រើប្រាស់ នាថ្ងៃទី០២ ខែវិច្ឆិកា ឆ្នាំ២០១៩ កន្លងមក និងបានលើកឡើងអំពីការងារមួយចំនួនដែលបានពិភាក្សាក្នុងជំនួបកន្លងមកជាមួយ លោកជំទាវ Eva Nguyen Binh កាលពីថ្ងៃទី២១ ខែមិថុនា ឆ្នាំ២០២១ និងបានឱ្យដឹងថា ចាប់ពីឆ្នាំ២០០០ ដល់ឆ្នាំ ២០១៨ មានគម្រោងវិនិយោគរបស់ក្រុមហ៊ុននៃប្រទេសបារាំងចំនួន ៦ គម្រោង មានផ្ទៃក្រឡាសំណង់សរុប ៦៤២៦៥ ម៉ែត្រក្រឡា និងមានទុនវិនិយោគចំនួន ១៨ ៤៨៥ ២៩០ ដុល្លារអាមេរិច។ ក្រុមហ៊ុននៃប្រទេសបារាំងដែលមានចុះបញ្ជីនៅក្រសួងរៀបចំដែនដី នគរូបនីយកម្ម និងសំណង់នៅមានសុពលភាពមានចំនួន ៤ ក្រុមហ៊ុន ក្នុងនោះមានក្រុមហ៊ុនសាងសង់មួយនិងក្រុមហ៊ុនសិក្សាគម្រោងប្លង់ចំនួន ៣។ ឯកឧត្តមឧបនាយករដ្ឋមន្ត្រីបានលើកឡើងថាបារាំងនិងកម្ពុជាមានទំនាក់ទំនងការទូតជាមួយគ្នាជាយូរណាស់មកហើយ។ រដ្ឋាភិបាលបារាំងបានផ្ដល់ជំនួយដល់កម្ពុជាស្ទើរគ្រប់វិស័យក្នុងនោះមានវិស័យកសិកម្ម អប់រំ សុខាភិបាល ការពារជាតិ អភិវឌ្ឍន៍ជនបទ វប្បធម៌ និងអង្គជំនុំជម្រះវិសាមញ្ញក្នុងតុលាការកម្ពុជា។ ក្រៅពីនេះទីភ្នាក់ងារបារាំងសម្រាប់ការអភិវឌ្ឍន៍ (AFD) បានសន្យាផ្ដល់ហិរញ្ញប្បទានដល់កម្ពុជាពី១០០ ទៅ ១២០ លានអឺរ៉ូ ក្នុងមួយឆ្នាំផងដែរ។ ទន្ទឹមនឹងនេះ ឯកឧត្តមឧបនាយករដ្ឋមន្ត្រី ជា សុផារ៉ា បានថ្លែងអំណរគុណដល់ស្ថានទូតនៃសាធារណរដ្ឋបារាំងដែលតែងតែបានផ្ដល់កិច្ចសហប្រតិបត្តិការល្អជាមួយក្រសួងរៀបចំដែនដី នគរូបនីយកម្ម និងសំណង់ និងបានថ្លែងអំណរគុណចំពោះក្រុមហ៊ុន VINCI របស់សាធារណរដ្ឋបារាំង ដែលបានជួយគាំទ្រដល់គណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាក្នុងការស្ថាបនាហេដ្ឋារចនាសម្ព័ន្ធ ក្នុងក្រុងព្រះសីហនុ ខេត្តព្រះសីហនុ ទោះបីក្រុមហ៊ុនកំពុងជួបប្រទះវិបត្តិជំងឺកូវីដ១៩ ដែលបណ្ដាលឱ្យមានការធ្លាក់ចុះធ្ងន់ធ្ងរនៃប្រតិបត្តិការអាកាសយានដ្ឋានយ៉ាងណាក៏ដោយ។ ឯកឧត្តម Jacques PELLET (ហ្សាក់ ប៉ីឡេ) ឯកអគ្គរដ្ឋទូតនៃសាធារណរដ្ឋបារាំងប្រចាំកម្ពុជាបានថ្លែងអំណរគុណដល់ ឯកឧត្តមឧបនាយករដ្ឋមន្ត្រី ជា សុផារ៉ា ដែលបានបង្ហាញជូនយ៉ាងក្បោះក្បាយនូវសមិទ្ធផលការងារ និងការងារពាក់ព័ន្ធកិច្ចសហប្រតិបត្តិការ រវាងក្រសួងនិងស្ថានទូតបារាំង និងបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រសួងរៀបចំដែនដី នគរូបនីយកម្ម និងសំណង់ ក្នុងការបំពេញតួនាទីភារកិច្ចរបស់ខ្លួនបានយ៉ាងល្អប្រសើរ ព្រមទាំងបានសន្យានឹងបន្តកិច្ចសហប្រតិបត្តិការដ៏ល្អនេះជាមួយក្រសួងរៀបចំដែនដី នគរូបនីយកម្ម និងសំណង់ ឱ្យដំណើរការកាន់តែរលូនបន្តទៀតផងដែរ៕
